Happy New Year!!

繼上次在平安夜去2nd In份工後,早兩日又再收到果間公司叫我昨日朝3rd In! Godness!臨近new year好有holiday mood,都諗住暫停搵工盡情普天同慶一下,過咗Jan 2 至再黎過,昨日原本已經有晒schedule,諗住上午執嘢等下午送新床黎,然後晚上約朋友出街~~~點知就俾呢個call打亂咗計劃!老實講,收線後真係有一絲衝動唔去In呀,奈何都要向現實低頭!其實上次2nd In,個senior都講會再call for 3rd In,即好大機會請我,只係循例見見個GM,otherwise,唔會咁有誠意同我講成咗個幾鐘啦!自己都有把握嘅,只係覺得間公司又唔係咩intl firm,recruit一個人要in 3次好費時失事...

結果都好順利完成個interview,個GM話請我同俾時間我考慮,但...自己又覺得呢份工唔係first priority,就算返咗都未必長做,如果答應咗都似乎睇短期回報可以早日有＄用,唔駛等到過完農曆年先至有工做~~但一旦返咗工又好困身,好難再可以抽到時間見工,唉!好煩呀,究竟應否為著一時之急去返呢份工呢？或是放棄呢?!

今晚係除夕,希望人人都有個開開心心嘅2006!

Happy New Year and all the best!! ^.^

年尾中獎

上星期放紅假之前收到郵局通知去拎掛號郵件,仲一連兩封同媽咪一封,心想點會咁啱架,一定係媽咪參加果d乜乜日報送大禮抽獎,悄悄擅自用咗我嘅ID黎填抽獎表格,仲同我拗話如果抽中報紙點會咁大手筆俾十幾蚊一封發出掛號信件黎通知得獎,哈!所以今日去揭盅,一如我所料,真係抽中!雖然唔係咩大獎,不過有$500 WING ON cash coupon and $200 supermarket coupon都算唔錯啦!估唔到我有d小財運喎...可惜全數收歸媽有,不過唔係佢咁勤力參賽,都唔會抽中我嘅!

嘿,唔知d好運會唔會由此起呢?!希望首先搵番份好工,然後帶到落2006年啦~~~

維園工展會

雖然昨日係boxing day,但似乎收唔到想收嘅禮物~~
人大咗真係唔係好捱得夜,所以昨日都係乖乖留在家休息下,反而今日同咗媽咪阿哥同埋佢女友去咗行工展會(實在係一個意想不到嘅組合)!可能今日仲係紅假,超多人呀！簡直有種感覺自己行緊年宵咁!加上返黎咁耐都盡量避免行咁擠擁嘅地方,搞到一邊行一邊鼻敏感發作,摔到鼻都紅晒,真攞命!

行到一個有工展小姐嘅擋攤,嚇然發現果個家陣晚晚睇刑事都會見到佢嘅海俊傑企定定幫手拉票喎,佢似乎覺得好多人會認得佢咁,當正自己係生招牌多過位工展小姐~~~

Christmas day

昨晚..(應該話今朝至啱)好晏先瞓,不過未到十二點已組經倖俾人嘈醒!夜晚入咗朋友屋企開P,見番班老朋友,大家交換下禮物食下嘢,玩下cards同講下笑下,好快就過咗一個愉快嘅christmas night! ^.^

**在此多謝阿lin預備咗d精心炮製食物俾我地...thx!

平安夜

都有兩年冇在港過聖誕,感覺好似在UK過第一年christmas一樣新鮮,因為在果邊過嘅都好peaceful and family feeling,加上以往身處HK時眼見街上五光十色嘅聖誕裝飾都習以為常,認為呢種模式係理所當然,反而今年返到黎HK再見番,特別覺得有氣氛同lively,又好雀躍!

今晚平安夜過得真好……

X'mas 2005

MERRY CHRISTMAS!!!

越窮越見鬼

今日剛in完一份工,今次終於唔洗in好耐,因為只係first in HRM，呢個女人比起之前果幾個nice好多!話時話,唔知點解對HR果ｄ女人總係冇乜好感,多數都係一副惡死兼麻煩嘅模樣！

真係開始相信一句話"越窮越見鬼",糧地已經夠死架啦,前晚仲要發覺晚晚瞓開果張"龍床"竟然爛咗!!應該係話俾阿哥踩完上去就發現床側爆開咗兩度深深的裂痕,（都唔知應唔應該賴佢好!)不過張床畢竟都瞓咗十幾年,都係時候換過,只不過似乎唔係適當時機拎＄出黎買過張新嘅啫,頓時令我嘅膊頭百上加咗幾百斤...=.=

早兩晚一連出街食咗兩餐生日飯,在酒樓擺兩圍慶祝Dad&Mum's birthday,由於未搵到食嘅關係,只係趕工織咗兩條溫暖牌俾佢地當生日禮物,佢地都應該鍾意掛？!

p.s.啊...昨晚又夢見果個人嘞...

失望

返咗黎個半月了,病足咁耐,雖然話條氣順番好多,但始終未能切切實實斷尾,間中都仲咳幾聲同流鼻水!所以以防萬一,出出入入都仲要帶定條scarf暖頸~~

話就話因為個病而多少拖慢咗搵工嘅進度,好多人都叫我養好病先唔好急於一時,但係自己其實都想快d搵到工做,一黎等$駛,二黎唔想家人擔心而有所壓力,三黎唔想成日俾自己太游閒,要確確實實揾出一個路向,因為就算滿腦子大計做自己想做嘅嘢,都要有$$$去實行先得,冇$就乜都唔洗諗,一切都建基於$$$呀!

其實之前都預咗年尾返黎搵工一定有難度,只不過返黎冇耐就有一兩個interview嘅機會,俾咗個假希望我,以為自己真係咁好彩好大機會唔洗"mau"到過咗年,唉點知都市計畫係失望而回,每次仲用咗成三四個鐘in一份工呀!!!總之好彩嘅嘢通常唔會發生在自己身上嘞~~而定唯有講呢d嘢係急唔黎啦!(但一諗到要"mau"到過咗農歷年,就覺得自己好悲哀,咁會悶死我架!!)

呢排除咗"癡"住部腦搵工外,為咗唔俾自己懶惰,就搵d嘢做下黎充實自己,首要係織下頸巾俾人(已經成功起咗4條貨),然後逛逛書局同到lib記借d興趣書睇,前兩日還挺起心肝去報普通話讀不過要二月先開課呢!

舊地重遊

又話會好凍嘅?!只係夜晚feel到些小涼意,凍極都市計畫有成十幾度,尤其在旺角鬧市人多車多,溫度都同平日差唔多!都詭人嘅~~
昨日終於約埋幾個中學同學仔返去過咗5年嘅TTC探下d阿Sir同Miss,其實主打都係"伍蛇",其他係其次(哈!咁講好似好偏心!)...搭巴士入大興雖然車程唔係好耐,但就搭到好想嘔兼頭暈!可能呢兩年在UK時少搭巴士代步,近則行,遠則搭火車同tube,發覺而家唔係好搭得車,搭兩下就頭暈反胃,真係"水皮"!
言歸正傳,今次返到TTC,感覺好唔同,似陌生而新鮮,但又似曾相識嘅感覺,怪怪的~~淨係講個校舍都已經面目全非,增設咗成幢新翼,好多新設施同科目配合發展之餘,連花草樹木都生息不少...唉,而家d學生真係幸福好多!
以前教過自己嘅老師,大部份都依舊任教,有後生咗亦有老咗,雖然佢地對我地只係依稀有印象,已經講唔出我地個名了,但見番佢地,感覺好開心,因為見到佢地往往令我諗起焦無憂無慮嘅5年中學生活!

WTO 2005

近日鬧得全城熱烘烘嘅世貿會議昨日終於舉行,從新聞中睇到大批南韓農民遊行示威嘅片段,真係不禁替香港警察嘆一句辛苦同無奈!我諗今次係香港警察有史以來最忙最大型嘅一個任務~~其實我覺得d農民嘅反對行動又似乎過激,係咪應該有其他方法去表達佢地嘅不滿呢?!...最搞笑係有條片訪問個農民代表,竟然話覺鬼得HK police對佢地採取嘅態度好溫和,仲好似好appreciate同respect咁添=!= 言下之意,咁係咪即係暗示南韓警察好暴力呢?!...

母校

今晚從一個他人嘅blog睇到提及佢母校,突然間心血來潮走去搵番自己母校嘅website睇睇,睇到好多校園生活相,不禁令我諗起"這校園、這班房、這走廊、這禮堂..."呢首歌~~canteen、球場、甚至一草一木...有一種似曾相識嘅感覺,仲見到好多以前曾經教過自己嘅老師一副副熟識嘅面孔,看似依舊,其實大家都老咗好多,畢竟由中一計起,都有十年多光景了,有d由初出茅廬嘅青年教師變到十年後而家嘅老成持重先生主婦模樣,有d由黑髮變到灰白髮......真係歲月催人老~~

<企中間果個就係我中一班主任阿伍sir嘞,唔知其他書友仔睇到呢張相又認得出幾多個老師呢?>

**圖片取自TTC website**

就係咁,一睇就睇咗成個鐘!唔知睇到我個blog嘅朋友仔會唔會好似我咁,睇到人地個blog後憶起自己母校,撎番個website睇睇呢?!
突然有個念頭好想返去走走呢~~

HK Disneyland

昨日朝10點都未夠就去到Disney玩,都不知幾多人呀!事緣阿大口仔識人帶挈拎到free tkt入場,咁梗係冇執輸跟埋去玩啦,可以慳番$295喎,哈哈!

除咗早上稍為清涼,天氣大致上都唔錯,中午時仲幾熱下添!之前成日聽到報導話HK Disney好細,冇預期咁多人去,員工service差等...但就我所見,其實又唔係咁差,地方係就係真係好細(唔玩game嘅話,相信30分鐘可以行完整個樂園,行多一兩次就可以認得d路),不過員工嘅服務態度都幾好呀,好似餐廳食完嘢d阿姐會好快手走埋黎有禮貌問咁可唔可以收咗d嘢,又話多謝光臨咁~~仲有果d在四圍都有souvenir售賣亭嘅staff,明知大部份人只有係咁試卡通帽影相而唔係真正會買(正如我地呢d!),有個姐姐真係好nice任我地試戴又主動suggest我戴邊款然後仲幫我地影合照,呢d服務態度冇得頂啦!

game方面就...真係嘆一句"把鬼"!尤其係果個出晒名嘅Space Mountain,真係好失望,完全feel唔到有坐過山車嘅刺激感,礙於地方限制問題,個space唔夠黑同唔夠多起伏位,同在LA玩過果個冇得比呀!好彩拎咗fast pass唔駛等好耐~~其他game大致上都等咗半個鐘左右,都合理嘅,因為如果冇人排隊又好似冇咗樂園嘅氣氛!掛排隊時不時耳邊都傳來操國語嘅同胞聲音,不過就好唔明白,眼見其實都有好多香港人,乜星期四d小朋友中學生唔駛返學,d青年中年人唔駛返工咩?!難道香港嘅經濟仲係差到好多人同我呢d閒人一樣失業?!

巡遊節目唔及煙花精彩,保持到去過其他Disneyland嘅水準!全個樂園最值得推介嘅係果兩個"Lion King"同"Golden Mickey" shows,仲有另外一個3D show都非常吸引,值回票價!去至於食物方面都OK啦,唔算太貴食得入口嘅,$40碟粉麵飲有杯熱茶送,飲品由$10-$20不等,只要唔抱住高要求嘅心態光顧,係可以接受嘅!

總括而言,Disneyland都係啱小朋友玩多d...

Mickey & Minnie Buzz LightyearChristmas Tree

Sleeping Beauty Castle

fountain

Entrance

失望

今日......好失望呀!!!

秋高氣爽

返咗黎一個月,終於感覺到秋冬寒意嘞~
啞咗一晚,好在第二朝有番把沙聲,原先打算推咗朋友元朗BBQ,但難得見到約齊人,所以後尾都決定一到,仲第一次試搭西鐵,真係覺得自己成個"大陸喱"咁!第一次坐西鐵,感覺車廂好清潔乾淨又快捷,心裡又自不然跟歐洲嘅交通網絡比較,香港嘅service真係好好嘞,私人加一分!
,雖然話晒中學時代住屯門都曾經在元朗留過不少腳毛,但入到元朗就好似迷路一樣,人面全非好多嘢都變晒,同朋友仔閒談間都記唔起身處嘅郊野公園,中二時學校旅行已經到過!眼見大家在寒風人中燒烤,我就只可近觀而不可食,一於戒戒戒!忍口只聞住一陣陣炭燒雞翼味~~

保持沉默!!

死伙!!!我失聲了!!經過一個月黎先後睇咗三次醫生,又試過自己買咳水食後,在反覆嘅情況冇好轉下,前日終於要睇第四次醫生,係第四次呀!!今次換過睇第二個醫生仲"拮"埋針,食咗藥後係就係好似收咗鼻水同冇好似哮喘咁咳,但就無端端失咗聲,死未!!就好似醫好一處,第二處又病發咁!
唉...都唔知病到幾時~~~

而家擔心黎緊星期二個interview點算,求神拜佛到時開番聲啦!

果實沒有種植=矛盾?!

上次黎寫嘢係23號,咁快又一個星期啦!!呢個星期真係無無聊聊咁過咗,所以都冇咩好寫記低~~
唯一特別嘅就你係同阿珍珍,CC and Tazed食晚飯,係返黎第一次去人多車多嘅Causeway Bay,好在都冇真正咁逗留好耐,上車落車上樓就食飯然後搭返車返屋企,所以都冇被污氣籠罩住~~

Other than that,都好似冇咩做過,最多都係send下CV搵下工,在家"痴"住電視,陪阿媽飲茶買下餸咁啦!雖然朋友都叫我抖下休息多d等身體好番先搵工,但一來實在不能因為呢個手尾長嘅病而拖住搵工進度,二來又覺得呢d"師奶"生活都幾無聊,間唔中過下就好,過得太耐驚自己會越來越懶呀!而且目前最緊要都係快d搵到工還債,拎$返屋企,唔想被人覺得畢咗業咁耐仲游手好閒,其實真係有無形中嘅壓力架,好心急有份工但又想skip咗interview果part喎...就好似想食芒果但又想skip咗種植嘅過程...幾矛盾呢!

<呢個係好cute嘅阿B>