是日精選

是日星座精選(from SINA):

"感受到有些體能上、精神上的不足。思緒也較無法集中了，似乎是該充電的時候了。這一陣子的努力衝刺似乎讓你消耗掉不少精力的樣子喔。"

百分之二百準確呀!!我要放...............假!!!=.=

唔知點解,呢兩日不時諗起一個人~~點解呢?!

電髮

昨日咁好天氣但臨時臨急約唔切朋友去沙灘,好可惜!於是依原定計劃去整下堆亂到好似草嘅頭髮,本應都預計得到星期六salon會多人同埋電髮需時,但估唔到自己5點去到居然要坐到最後一個,間舖9pm close自己就10:30pm先走,足足5個半鐘呀,坐到腰都直埋!今次又再電個爆炸裝,但剛電出來嘅效果始終唔夠想像中爆,個髮型師哥哥仲話叫我唔好電咁爆同剪咁短,(唔明點解佢次次都唔贊成我剪短d頭髮,成日話咁爆仲要剪短就會好似個波咁!=.=) 但其實自己想剪短d,不過最後都聽咗佢講,都ok嘅,其實電髮都係想減下壓啫~~

個人認為天氣好,心情都真係好d,雖然昨日就在salon渡過,不過當中發生咗一d小插曲,感覺就好似開心咗一日一樣,好輕鬆!本來諗住寫出來,但又好似會有人睇到,都係唔寫好了~~

失策遲大到

好熱好熱呀!!!.........一輪天雨後,呢兩日突然間熱起來,34度....香港嘅夏天終於返黎啦!又熱又痴簡直想死呀! 見到咁好太陽,即刻有去沙灘晒守太陽嘅衝動,好想晒黑d呀...不過香港始終唔同英國,唔可以在自己屋企嘅yard隨意躺下晒太陽,要晒就要專程搭車去海灘,都好唔方便!

一星期眨眼又過咗,終於有時間黎寫下部落嘞...星期三晚終於唔駛做到天光先走,不過做到4點幾囉都叫好架嘞~~=.=原先諗住瞓兩個鐘7點返到公司print埋見客嘅圖,誰不知......呢一覺實在太好瞓!明明set咗鬧鐘,點知竟然唔響,一瞓就瞓到9點!!!咁啱家姐果朝唔駛返工冇嘈醒我,如果唔係老豆出廳食早餐嘈醒咗我,都唔知醒即刻彈起身望下個鬧鐘,仲同自己講咗句"大檸樂"!然後手忙腳亂咁即刻打俾阿頭say sorry自首,再打俾約好在公司等一齊去碼頭嘅同事,原來佢地響爆我手機同打去我屋企電話,只不過我熄咗機瞓所以聽唔到,搞到幾唔好意思呀~~之前幾次開通宵反而冇事,今次一瞓就出事,真係醜怪!最慘係同事唔知我未print晒圖,我要搭船過大海前趕返公司print埋d圖,沿途仲同繁忙時間碰個正著大塞車,結果去到澳門嘅地盤已經係中午12點幾!!開門入到去大部份contractors都走晒,只見到client嘅有關人等正同阿頭傾緊其他issue,頓時又覺得面矇矇不知好何是好,so embarassing!唉...早知佢地冇等我d圖, 就唔駛專程趕返公司print圖啦,就可以早d到到達地盤~~lucky that 阿頭冇怪我,只係自己覺得返工咁多年都未試過咁失策啫~~=.=

一星期

嘩!看看上回,先發覺原原來又足足一星期冇update下自己個部落啦~~工作,真係可以令人"狂"呀!
每逢周四開會嘅定律,星期返到公司一開電腦check check email,就即時被大夫一句話,一個自己嘅schedule,自把自為地向client改咗提前一日開會!換言之...原定星期四要趕起所有圖嘅死期,就此提早一日來臨,話改就改梗係輕鬆啦,因為做果個唔係佢嘛,心情就好似即時判咗我死刑一樣,十萬個無奈!=.=

結果,星期三咪又跟同team嘅同事開通宵囉!不過心知道冇可能依時完成所有圖,所以整晚都放慢腳步咁做,又加上MD又在公司上網開咗個channel睇波喎,個好自然散啦~~做到晨早5點幾攰到死,個同事又準備走,冇理由自己一個留低繼續做咁慘架,所以最後都決定放棄,執嘢返歸瞓返兩個鐘先再返工!返到屋企沖過涼,真係瞓咗兩個鐘就俾鬧鐘嘈醒,今個星期有得瞓都算唔錯嘞!

呢兩個星期天氣都不穩,大部份時間都天陰,心情自自然忐忑,無論身心真係好耐都冇放情咯~~根據自己早前定下"一星期玩一次"生活態度嘅改變,星期五晚就約咗tazed飯局,仲識多咗個新朋友添!不過相比之下,發覺自己原來都唔係好靜嘅人,究竟係咪早幾年少玩,而家人大咗就越多嘢講越open minded呢?!真係越來越爛玩呀!

今日做到下午4點先收工,本應想去整下個死人頭,d頭髮唔長唔短好難睇,但又因為今個月entertaining真係駛咗好多$$,搞到好窮,所以都係忍到下個月先整啦~~亦因為攰嘅關係,一個大好又晴朗嘅星期六竟然選擇返咗屋企休息瞓覺!!明天仲要返工呀~~damn!

今晚同佢通完電話,心情好似輕鬆咗一陣子,笑逐顏開呀~~大家共有努力啦!

ladies night

昨晚收工後就約咗一班人同阿lin食飯同佢慶祝生日,誰不知去到先發覺幾個朋友都冇到,最後得四美圖變成ladies night,雖然人少咗,但覺得幾個人傾下計咁仲好過一大班人無無聊聊,四個傻婆都亂說亂說,講下自己嘅夢,加上間bar嘅環境氣氛好舒服,一坐就坐到人家收舖都未願走!暇最勁嘅係返到屋企開門,見全屋燈火通明,原來全家人因為睇波都未瞓,媽咪仍然在打機呢,我沖完涼反而係最早上床瞓覺嘅一個!氣氛頓時變咗chinese new year eve咁,好搞笑~~

喜出望外的黑雨

昨日原本諗住前晚開完通宵,第二朝瞓晏d下午先返工,哈!十一點瞓醒時媽咪就話剛掛上黑色暴雨警告可以唔駛返工,簡直喜出望外!所以內心掙扎一時,結果都係決定唔返工,順便好好在家休養一下~~
不過開心總是短暫的!今朝返到公司check email,見到阿頭自己應承個客提早一日交晒所有施工圖同開會!!!即時啞口無言,不知應該可以俾咩反應呀,畫圖果個唔係佢,不知進度就為著自己schedule改deadline,人地個客都冇要求提早,佢就唔好咁搞到我地啦!真激氣!!!
唉.....得番兩日,仲係weekend,識飛都做唔晒啦!星期一都唔知點面對佢, 好唔想佢返黎,下星期一二都唔會期有得瞓嘞!!!

難逃一劫

上回提到以為睇醫院門診就可以慳番d$,但食咗藥同滴藥水似乎仲要痛得厲害,結果星期日半夜瞓到兩點幾就被耳仔痛醒咗,一直到天光都睡不著,最終都要再到法國醫院睇耳鼻喉專科,呢個醫生都幾耐心同有醫德,不過就"寸"d,話我個鼻冇事就唔好好似好過癮亂"呻",因為好易造成中耳炎喎~~佢一之次開過咗d退燒同胃藥加鼻敏感藥俾我,埋單盛惠$690!!唉....加埋上次門診,無端端要破大財成千蚊,唔止耳痛,"肉"都痛埋呀!

睇完醫生打過電話返公司話下午先返工,就返屋企瞓咗兩個鐘,然後好不願地起身返工~因為食咗d藥一如醫生所開嘅藥方所料,全身發熱不停出汗又頭重重頭痛,返到公司都做唔到d乜,頂到6點多就走返屋企咯!d藥嘅副作用真厲害~~

星期三晚又做到朝早五點,返屋企沖過涼換過衫,今次叫做有45分鐘眠一眠,跟住"的來的往"趕返公司執拾過大海開會咯~~今次直接落地盤同班contractors開會,除咗自己同客戶方面嘅admin兩個女仔之外,對住全部都係男人,d建築工人見到我帶著安全帽四圍走,就覺得好出奇咁目光一直盯著我,好不自然呢!其實香港嘅地盤見到女性巡視,其實都好普遍,有什麼好奇呢?!

今個會總叫開得順暢,唔知點解,這陣子好似已經習慣沒有阿頭嘅日子,自己同同事雖然硬著頭皮應付好多新事物,但壓力總好似冇阿頭存在時咁大!星期日佢就放完假,星期一我就死期到咯,好驚呀!

好痛

頭痛,耳痛....好痛呀!!!

中耳道發炎

落咗足成個星期雨,真係有點煩厭~~

唔知係咪近期對耳要特別留神聽埋別人嘅工作,搞到撩耳仔嘅次數不其然地頻密,昨朝起身時一邊耳仔開始發痛足一整天,同媽咪講完,就俾佢所講傷及耳朵嘅嚴重性嚇到即刻去睇專科醫生,誰不知星期日法國醫院冇專科只有普通科門診,都要睇咗先啦,好彩醫生話只係中耳道發炎冇傷及耳膜,只要食藥同滴藥水便可,聽到個心都放心d~~而且睇門診比睇專科預算慳咗一半都好開心架嘞,因為當mum勸予要睇專科時個心有著十萬個不情願,一直盤算著如今只係糧頭就要破呢筆大財,(況且上個月洗多咗$$),所以不單止耳痛,"肉"都"痛"呀!不過為自己身體著想,更肉痛都要啦,有d嘢係唔慳得嘅~~

今日係六四,正正係大佬生日,睇完醫生走去買咗個 mango cheese birthday cake 返屋企同佢happy to you 添,好好味呢! ^.^ 祝佢生日快樂啦!!

中間人的苦處

呢個星期好忙,忙住做d非自己工作範圍內嘅事,鬼咩~~阿頭拍拍pat pat就放大假,交低大堆大堆手尾俾我跟,首先係叫我做好自己果part之餘,仲要幫另外一位資歷較淺嘅同事手,因為佢係ass. architect而唔係ID,對matieral selection同fixing唔係咁熟,所以叫我協助佢果part揀料同design,其次就係Thu開會果時幫佢同d contractor夾!>>>>>>即係叫我睇住佢囉!=.=結果,我端午節咪又係要返工做到半夜四點囉,,簡直想死呀!!最慘嘅係所做嘅只係應付Thu嘅會,好多同自己負責果part冇直接關係嘅"他人"鎖事,日日做中間人做admin做聯絡...etc.,根本都未有時間正式畫自己嘅圖,damn!!唉,大嘅唔在就難為我呢d做中間架嘞,自己都未顧掂,唔上唔落嘅併真係做到死咗!

Thu開會就只係自己同個同事過大海,同client開例會,硬住頭皮對住成班一望就知經驗老到嘅人,拼埋自己就好似新手一樣,覺得自己講嘢唔夠convincing但又要裝出一副立場好堅定嘅樣子撐場,同事仲要"懵下懵下"好多嘢根本要自己負責嘅又未做好,structural嘅嘢我根本又唔在行,我嘅角色就係解答有關inti嘅嘢, 所以想幫口都幫唔到,結果咪被班contractor問到口啞啞,最後我變咗做打完場嘅人,話後補d資料俾人地囉,不知幾尷尬!不過反而自己果part都好彩有驚無險度過,開完會反而有d成就感呢!因為好似都未試過自己同班客& contractor deal,以前就算見客都頂多一個或一對couple用戶,而家要對嘅係講緊一個發展商嘅客同一班建出成個屋苑幾千個單位嘅contractors,梗係震過貓王啦!

雖然係忙,但冇阿頭在,心理上都輕鬆小小~~至少今個weekend我可以選擇放自己假,真係返咗5日半咋,哈哈!一於置諸不理,一切留待下個星期返工再搏鬥過!