恭喜發財

新年快樂,新春大吉,狗年行大運,心想事成...
昨晚唔知係咪做咗成日大掃除,好早就眼瞓了!又唔知係咪掃一寸寸厚嘅塵時吸咗d塵,搞到成晚至而家喉嚨都好唔舒服,好唔鍾意新年流流有呢種感覺呀~~~今晚要出去同大堆親朋戚友食個年飯,順便今年仲可以親手埋利是呢~~~

落地開花

雖然新年流流,但都不得不說一句"激死"!!年廿九,一家上下今日都好落力乖乖留在家大掃除,就連平日唔執屋企嘢嘅大姐都主動地抺窗,咁我當然要做好本份抺埋一份啦,誰不知...兩年冇抺過自己嘅窗(我唔在的兩年有冇人抺過就不得而知嘞~~),穆一隻都未打個全開就""一聲脫下然後再成隻"砰嘭"一聲由三樓跌咗落街,把我嚇得半死!連忙探頭出窗外睇看看有冇傷到人或車,好彩窗口係向後座內街,未有傷及任何人亦冇乜人知,於是襯未有太多人發覺就同媽咪落樓下收拾殘局兼毀屍滅跡,因為鋁窗跌落街係犯法架,點知原來個管理員完全聽唔到有聲喎!好跌唔跌,年廿九先黎跌,臨時臨急邊揾到人上門整番隻窗呢?!仲要呢兩日會下雨添!結果...用咗個好低B嘅方法,就係用牛皮膠紙將塊大膠布四面貼實,唉...希望呢兩晚唔好落雨啦~~~~~
咁樣一個落地開花,唔知會否係一個不祥嘅兆頭呢?!好擔心添......

行花墟

昨日同媽咪去咗花墟買年花,嘩,可以用"墟坎"來形容!人山人海,迫到有如置身年三十晚嘅維園,搞到我走出人堆後個鼻又再一次打噴嚏咗成晚!"o"
迫咗兩個多小時(根本成條花街只係行咗一半,其餘一些小巷還未踏足到呢~),終於買咗今年流行嘅"串串金"同"富貴子",串串金一大顆黃黃的,好似桃花一樣;而富貴子就細細粒紅紅的,驟眼看似一串串mini冰糖胡蘆,好可愛;媽咪話今年d花價貴過上兩年,有d幾十大元一枝枝計,亦有d三五佰一束,其實咁計,一條花街一日一萬幾千人光顧,保守估計每人平均花上二三佰(有d盆花如籣花更要花上一仟大元!),總生意額都非常可觀,花販一定賺到笑啦!

另外仲買咗一種叫"大象耳"嘅綠色陪襯植物,形狀幾特別,還會長出小花頭呢~~之後仲為咗d花買咗個大花樽,點知買到返屋企插晒d花先發覺樽口太大,搞到看似好凋零,好唔順眼睛!為咗稱心滿意,結果......又為咗個花樽再行多一次去花墟買過幾枝咗壯大整盆花嘅氣勢!雖然屋企行到花墟只不過十分鐘,可是抬著一枝枝比人高嘅串串金來回兩趟,都已經把我同媽咪累透了!最後用咗三佰多大元砌出一盆年花,都攰得開心嘅~~~

新年辦年貨

哈哈...新年就快到,唔知係咪受街外環境氣氛影響,好有shopping意欲,加上在鬼佬地方過咗兩年鮮為人知嘅農曆年,所以對今年新年多少有點興奮,於是呢幾日四出辦"年貨",博晒命咁俾藉口自己買咗好多嘢,衫仔褲仔同鞋仔都有!^.^其實仲有嘢想買,不過諗到月尾找卡數就死伙,所以都係收手吧~~

昨日in咗一份工,大概機會平平啦,都唔敢奢望!

***都唔知乜解究,一轉版面嘅title就乜都睇唔到,但轉番原本個名又睇到喎,激死呀...想轉下個title都唔得!!!

同日發市

今日天色陰沉,起身後上網同tazed聊咗幾句佢就話我心情似乎幾好,其實我只起身不久仲傻下傻下,還以為佢順口開河,點知...佢又幾準喎!下午一連收到幾個來電,其中一個係阿老闆揾我過年間做freelance,說時遲那時快,下一個打黎嘅竟然係月頭apply果間公司叫我去interview,冇錯~~係月頭嘅事了!收線後心一想,好似突然出現一道曙光,一係幾日唔發市,一係機會就同一日咁黎!跟住一鼓作氣下連apply兩份工,希望快有回音啦~~

最近聽到朋友講佢嘅家庭煩惱,忽然覺得自己其實擁有一個好健康正常嘅家庭,已經係一個bonus,應該值得慶幸!人生不如意十常八九,其實做人只要凡事睇開d睇遠d,好多嘢自然來得開心!
所以你要頂住呀,一覺醒來又係美好嘅一天!支持你...

版面大革新

呢兩日顧住修整個blog嘅新版面(見未有工返冇咁忙就來個大革新),以為呢度好似yahoo/sina/msn果d版面咁易下個掣就可以轉換,真係低估咗轉換嘅難度呀!!呢度嘅system好麻煩兼費時失事,要自己轉到html版面先可續一修改文字圖像顏色等項目,又唔可以將jpg/gif.簡便地upload為background,要先轉為host link方可post出來...結果......係花咗兩晚時間去熟習更改嘅運作!!gosh!!!對於冇學過電腦程式甚至web programming嘅我,真係有難度,下次有時間都咪再搵ｄ咁嘅嘢搞嘞!　=!=

就係抱住一日未征服到新事物一日都不肯罷休嘅心態,呢兩日就咁貢獻咗俾d無聊事上，搞到拖慢咁頹積極揾工嘅進度,不過挨年近晚,不到十日就過件年,相信登報請人嘅機會不多,還是耐心等到過咗年吧反正自～嘅holiday mood一早就出咗黎,早兩日仲走去冇＄學人辦年貨...嘿...服未!不過想買嘅就買唔到,冇預買嘅就買咗返黎~~

作怪

(陰)
唔知點解近期心情總是覺得"厭厭"悶悶咁~~冇工返應該比起其他打工仔來得游閒冇乜工作壓力,自己都唔明點解心情總係忐忑呢!難道我係賤命格?!要忙得死去活來冇時間諗嘢先得?!!
當務之急就係解決咗一個決定先,日子臨近只是不想作出結論而已!

2006星座運程

踏入2006年頭,當然要關心下自己嘅運程先,於是四圍搵下睇到以下預測:


愛情運---金牛座2006年因為戀愛宮位受到月亮感應點以及小行星的多重影響，愛情上可能會遭遇到一些特別的現象，關係的演變也多出乎自己的意料，使得你感到緣分或是宿命的奇妙。單身的你:很有機會遇到奇妙的緣分，對象也十分特殊，而你也有可能會不明就裡地，進入新的一段關係當中。

財運---一切繁忙的你，無論有沒有刻意花心思到財務上，也一定都會忙到這一方面的。那不如先花點心思來規劃會比事到臨頭才採取因應措施來得有保障多了！火星對財務宮位有所影響，可能會有揮霍或漏財的情形，這到了四五月之後，就會逐漸趨於平穩

事業運---2006年金牛座似乎特別繁忙，然而真正讓你吃力的地方不在工作本身，而是外務特別的多，能有經濟實效的工作，反而沒辦法用太多心力去投入，這也是你煩惱的原因。比起事業上的工作，家庭事務花費你更多精神。裡裡外外都要奔波，只能說是「能者多勞」囉。

嗯...甚麼為之"奇妙的緣分"呢?對象身份特殊?難道係G4特工?!

無事忙？！

oh...唔覺唔覺原本有成個星期冇上黎,唔寫即係冇特別事值得記低或是好忙,但諗番呢幾日做過乜又似乎記唔起,只係可能太零碎嘅雜事加起黎都不足為記~~其實印象中自己呢幾日都幾忙,正一無事忙!

首先本應應承咗朋友幫手諗個talk show嘅setting,點知自己可能太耐用腦做design,加上曾經熟練過３D嘢再用起來竟然笨手笨腳,冇晒水準兼做不出樣來,結果拖到而家都未交課,諗起都羞恥呀！

另外,就同ｄ朋友仔食下飯,努力咁完成第八條頸巾,見咗份不見也罷嘅工咁啦~.~好彩今日總算對自己有ｄ貢獻,付出咗幾個鐘去教下畫畫,搵番ｄ食黎填補連日來嘅娛樂費,雖然都係搵埋唔夠食,不過叫做好過冇啦

選擇放棄

今日天氣突然寒冷,先提醒到冬天還在!
一整日持續咁腰骨痛,用盡方法都唔掂,最終都要食藥止痛~~
下午終於作出個嘅決定---選擇放棄!放棄咗個諗咗好耐都找不到結論嘅choice!...放低了一個,似乎還有另一個決擇呢! _#_

安慰七獎

哈哈!今日同家姐搖控媽咪幫我買張電腦票六合彩,諗住博個運氣,竟然真係博到中咗三個字打收番$20打個和,反而買票嘅媽咪就落空喎~~真係羨慕死一注獨得果位人兄呀,五千萬呀!

夜晚同班舊同事食飯見到初為孕婦嘅老闆娘,一副幸福少奶奶模樣,唔知自己幾時先唔駛為糊口而疲於奔命呢?!

復發

死伙!昨晚食完一頓豐富嘅buffet後,今日飲嘢時又"濁"親,之後又開始黎料咳番,喉嚨成晚好唔舒服仲feel到有d痛,慘啦...唔想再俾$睇醫生嘞!

熱鬧的除夕夜

HAPPY NEW YEAR!!

由昨晚除夕玩到今朝5點幾先返屋企瞓覺!嗚...好耐未試過,前兩年x'mas同new year都過得好平淡,今年都算玩得癲嘞!除咗同班老朋友一齊過之外,仲約埋TI嘅朋友仔加埋佢地d朋友一行廿人一齊食晚飯睇laser fireworks,雖然d煙花就失色咗d,但可以同一大班自己黎自五湖四海嘅朋友歡聚一番,果種感覺都幾特別!^.^
食飯間餐廳在中環碼頭,除咗貪佢個view睇到煙花外,個set din就真係麻麻地嘞~~原來我呢期真係有d抽獎運,繼早陣子抽中cash coupons後,昨晚又被抽中得咗份小玩意,當拎番個彩咁啦...

食完飯十點幾大家就嘗試向Time Square進發,希望可以迫入中心地帶,可惜黎趁虛嘅人太多嘞,根本未埋到去附近街巷已經被人潮塞住了!好在有朋友諗到向警察叔叔撒謊話在Time Sq一間cafe book咗位,咁先可以順利"攝"入Russell St.,仲俾我地走咗入一間蚊型糖水舖扮等位光顧,邊等邊玩game好快就踏入count down時刻,臨尾仲"摃"埋上糖水舖果幢唐樓天台睇蘋果倒數,雖則被外牆廣告擋住大部份,但到少唔駛同萬人迫先,count down果一刻望下去整條街萬人空巷,場面幾咁壯觀呀!

開心count down過後,轉移陣地到朋友屋企繼續盡興,閒聊一番後就各自回家了!零晨４點幾在MK落車仍然可見滿街都是人,香港節日氣氛真係冇得"彈"!

2006到咗,等我訐番個願先~~