搵食甚艱難

好不容易過了一星期到7.1呢個weekend長假,終於可以抖下...

病足一星期,燒退了,但感冒仍然纏身!加上週初天氣悶熱,返工搭車時人多車多,簡直想暈低呀...所以之後落幾日雨都係好事~~

帶病返工已經辛苦,工作極忙都不再話下,最難頂嘅係...仲要無謂地受了一頓冤屈氣,被人瀉了一隻大獲,唉!...在"有你講冇人講"的情況下無奈忍氣吞聲,實在心有不甘,覺得萬般委屈~~~

結果...被照肺照足一個lunch time,連飯都冇謂口食,病到死死下手頭上一堆堆的工作又多又煩,又再一次深深體會到"搵食甚艱難"的道理!

病...(續)

昨日睇完醫生食過一次半打藥瞓足成個下午,喉嚨的確好冇咁,四肢的確冇好似痛到入骨,但仍然攰"籟籟"冇晒力,加上昨晚又瞓得唔好,開住冷氣都成晚夜醒~~

本來朝早如果如常返公司就諗住full day sick leave,但碰巧又事必要老遠入到東涌工作,想唔去又唔得,結果硬著頭皮做完事先向大佬請下午sick leave啦!今日天氣又熱,出入室內室友有中暑嘅感覺,好辛苦呀~~

話就話sick leave,返到屋企都3點幾以為可以瞓下,點知瞓唔夠兩個鐘頭就俾公事電話嘈醒,自己又衰做唔出唔接電話唔理,settle好後想再瞓又瞓唔著,結果唯有起身睇電視...成日人就好攰,但總係休息唔到....好耐都冇試過咁咯!快d到weekend啦,可以真正抖下...

病

唉...無啦啦又病倒!!喉痛頭痛又發燒,周身骨痛成個人軟晒,好病唔病揀正週末先病,搞到在家瞓足兩日呆頭呆腦!結果,都係要去睇醫生~~

呢d時節出入室內室外,真係好易病到,小心小心~~

事出突發

嘩,今日公司發生咗件突發事!

今朝原先返工前去咗新港site meeting,未到10點就收到HR同事電話,這邊廂通話中,另一邊廂同我一齊的兩個同事亦同時收到call,急召全個dept. 11點半返到公司開會~~收線後我地三個一直估著發生什麼事,最大不了都應該係話我地成team返工時間遲得過份等,於是唯有趕緊返公司睇下發生咩事~~

原來...係...有同事從project中收受supplier/contractor回佣,俾公司證據確鑿捉到正即炒!所以HR急call meeting,有幾個同事都逐一被問話!雖然各人都繼續做回自己岡位,但呢件突發事搞到成個dept都整日氣氛沉沉...老實講,近兩個月接二連三少咗幾個designers,人手不足遲遲未請到新人workload大咗仲發生埋呢件事,士氣確實受影響不少!最慘係有人在此形勢下仲領導不善,毫不體諒下級苦況,受完壓力就轉壓到我地班小薯身上!唉...公司大階級多麻煩就自然多~~

實屬巧合

近兩星期可以用三個字形容"忙忙忙"!~

一直同外間一般人一樣覺得做inhouse design一定"hea"好多,但做咗呢份工之後,真係發覺其實都唔係,至少呢幾個月未試過游手好閒,工作量有時最多都只可形容為...中等!較鬆動時叫一單接一單,忙的時候就好似近期一個人同時handle四五間舖,實在做到冇停手,早幾晚一連趕工ot,晚晚又貪心想趕返屋企睇電視劇,就情願拎晒未做完的工作返屋企做,迫不得已的三幾晚就留在公司ot,最夜試過11點幾先收工~~雖然比起上一份工,做到11點幾都唔算得係咩,但...真係頓時有種感覺自己的生活好似返到去一年前一樣,晚晚帶著永疲乏的身軀回家!!sigh.....i dont wanna go backto the hell~~>_!

早陣子記得自己講過,有晚無意中聽到伊健的"感激我遇見"而想起好多往事...哈,估唔到今日又咁啱案件重演喎!下午在harbour city聽到鋼琴王子彈奏出久遺了的"甘心替代你"...又係伊健喎!以前有一期佢的歌好hit,演古惑仔演到街頭巷聞,數數手指都十年了,唔認老都唔得~~原來好耐冇聽一首歌,突然再聽,感覺係特別好聽架~~下次有同一感覺出現,唔知會唔會又係伊健的歌呢?

動搖

懶...懶懶!...近期生活上都有好多有感而發,但總係懶著寫...

07年的生活好似過於平靜,好想吸收一些新知識,好想有不斷嘗試新事物,好想識多些不同層面的人,好想好想......年紀唔細了,唔想在放假的日子裡總是逛街買嘢,飲飲食食同瞓覺......難道在香港生活的日子就是這樣??真係唔想....

於是,上網四圍search下有d咩課程報讀,總是拿不定主意來...

最近對做了4個多月嘅工開始動搖,最初一抱嘗試的心態去接受呢份工,覺得可以學到新事物又是新挑戰,於是定下目標多放一兩年時間去投入....但 因為最近經歷了些無謂又無聊的辦公室政治遊戲後,開始對自己投資在這份工的時限有所動搖,覺得自己應否繼續去適應自己不善面對的遊戲呢?!...