充電

經過一連兩三星期衝鋒陷陣式,捱更抵夜做通宵嘅工作生活,趕完手頭上嘅project stage,暫時可以叫稍稍鬆一口氣,上頭都見我地捱得辛苦於是趁佢呢個weekend出trip見客,昨日就放返我一日假,終於都可以休息下,一日咁多啦!

不過老實講,咁捱法,事後休息返十日都補唔番,尤其自己唔再係十幾廿歲,一兩晚唔瞓第二日已經好似冇晒電咁,皮膚仲差咗,朋友一見我就話比起未返工前,好明顯個樣"殘"咗好多,但講緊只係前後不到三星期嘅事!! =.=

於是就趁好難得有一日假期,昨日就好好利用咗盡情做d返工冇時間做嘅事,例如同家人去飲茶同電髮加埋配contact lens,今次同三幾年前一樣,受壓力賀爾蒙影響下電咗個爆炸裝,不過其實又冇之前果個咁勁,反而今次curly得黎鬆d,都ok嘅......原本打算電髮後再爭取時間去shopping,可惜一電就電咗三個幾鐘,想行的店舖都差不多關門,結果只好回家了!雖然今日一連大出血,但辛苦錢揾得黎都係駛,駛得開心咁都係值得嘅,就當買d嘢獎勵下自己咁啦~~~